નાના હાથોમાં મોબાઈલ, મોટી જવાબદારી : તારાપુર અમન લઘુમતી શાળામાં સાઇબર સચેતના નો સશક્ત સંદેશ.
આજનો યુગ ટેકનોલોજીનો છે. મોબાઈલ ફોન હવે ખિસ્સામાં નથી રહ્યો, પરંતુ સીધો બાળકના મન સુધી પહોંચી ગયો છે. રમકડાંની જગ્યાએ સ્ક્રીન અને કહાણીઓની જગ્યાએ રીલ્સ જોઈને મોટી થતી પેઢી સામે એક અદૃશ્ય પરંતુ ઘાતક ખતરો ઊભો થયો છે ,
સાઇબર ક્રાઇમ. આ ખતરાને સમયસર ઓળખીને તેનો સામનો કરવાની સરાહનીય પહેલ અમન લઘુમતી શાળામાં જોવા મળી.તારાપુર પોલીસ ના સાઇબર ક્રાઇમ સેલ દ્વારા આયોજિત જાગૃતિ કાર્યક્રમ માત્ર એક ઔપચારિક બેઠક નહોતી, પરંતુ વિદ્યાર્થીઓના ભવિષ્યને સુરક્ષિત રાખવાનો સચોટ પ્રયાસ હતો. શાળાની લોબી માં જ્યારે પોલીસ અધિકારીઓએ બાળકો સાથે સંવાદ શરૂ કર્યો, ત્યારે વાત કાયદાની નહીં પરંતુ સાવચેતી,સમજદારી અને સુરક્ષાની હતી.
આજકાલ નાનાં બાળકો અજાણતાં જ અજાણી લિંક્સ પર ક્લિક કરે છે, ઑનલાઇન ગેમિંગના બહાને ફ્રોડના જાળમાં ફસાઈ જાય છે અને સોશિયલ મીડિયામાં ખોટી ઓળખ ધરાવતા લોકોના સંપર્કમાં આવી જાય છે. ઘણી વખત તો ભૂલ સમજાય તે પહેલાં જ નુકસાન થઈ ચૂક્યું હોય છે
માનસિક રીતે પણ અને આર્થિક રીતે પણ. આ જ વાસ્તવિકતાને સરળ ઉદાહરણો સાથે વિદ્યાર્થીઓ સમક્ષ મૂકવામાં આવી.
કાર્યક્રમ દરમિયાન બાળકોને સમજાવવામાં આવ્યું કે મોબાઈલ મિત્ર બની શકે છે, પરંતુ અંધવિશ્વાસ કરશો તો એ જ મોબાઈલ દુશ્મન બની શકે. પોતાની વ્યક્તિગત માહિતી, ફોટા, પાસવર્ડ કે ઓટીપી કોઈને પણ આપવો નહીં, અજાણી કોલ્સ અને મેસેજથી સાવચેત રહેવું અને કોઈ પણ શંકાસ્પદ ઘટનામાં માતા-પિતા, શિક્ષક અથવા પોલીસને તરત જાણ કરવી
આવી મહત્વની શીખ વિદ્યાર્થીઓના દિલ સુધી પહોંચી.આ કાર્યક્રમનું સૌથી મોટું મહત્વ એ હતું કે બાળકોમાં ડર નહીં, પરંતુ સમજ પેદા કરવામાં આવી. પોલીસનો અર્થ માત્ર સજા નહીં, પરંતુ સુરક્ષા છે , આ ભાવના વિદ્યાર્થીઓના મનમાં ગાઢ રીતે બેસી ગઈ. તારાપુર પોલીસ ના સાઇબર ક્રાઇમ ટીમે બાળકોને વિશ્વાસ આપ્યો કે કોઈ પણ મુશ્કેલીમાં કાયદો તેમની સાથે છે.
શાળા સંચાલન અને શિક્ષકવર્ગ માટે પણ આ કાર્યક્રમ આંખ ઉઘાડનાર સાબિત થયો. કારણ કે આજે એક સચેત વિદ્યાર્થી જ આવતીકાલનો સુરક્ષિત નાગરિક બને છે. સમાજમાં વધતા જતા સાઇબર ગુનાઓ સામે લડાઈ લાઠીથી નહીં, પરંતુ જાગૃતિ અને જ્ઞાનથી જીતવાની છે , આજે અમન લઘુમતી શાળામાં એ લડાઈનો મજબૂત પાયો સાઇબર સેલ દ્વારા વિદ્યાર્થીઓ માં નાખવામાં આવ્યો.
ડિજિટલ દુનિયામાં સાચી સુરક્ષા પાસવર્ડ નથી, સમજદારી છે ,અને આ સમજદારીનો દીવો આજે તારાપુર ની અમન લઘુમતી શાળામાં પ્રગટ્યો.
બ્યુરો:આરીફ શેખ
